2026 оны 9 дүгээр сарын 17-18-нд Улаанбаатар хотноо “хөдөлмөрийн эрүүл ахуй“-н чиглэлээр Ази тивийн хэмжээний томоохон үйл явдал болж өнгөрлөө — Азийн Хөдөлмөрийн Эрүүл Ахуйн Сүлжээ (ANOH)-ний 9 дэх хурал Монголд анх удаа зохион байгуулагдав. Үүнээс өмнө 14-16-ны өдрүүдэд мэргэжил дээшлүүлэх сургалтууд явагдсан байна.
Хурлыг хэн зохион байгуулсан бэ
Хурлыг Монголын Хөдөлмөрийн Эрүүл Ахуйн Үндэсний Холбоо (MNAOH) нь Азийн Хөдөлмөрийн Эрүүл Ахуйн Сүлжээ (ANOH)-тэй хамтран, Гэр бүл, хөдөлмөр, нийгмийн хамгааллын яам, Хөдөлмөрийн Аюулгүй Байдал, Эрүүл Мэндийн Төв, мөн АШУҮИС-ийн Нийгмийн Эрүүл Мэндийн Сургуулийн дэмжлэгтэйгээр зохион байгууллаа. Хурлын зорилтот сэдэв нь “Хөгжиж буй бүс нутгийн ажилчдыг хамгаалах, зайнаас мэргэжлийн зөвлөгөө өгөх” байсан.
Юуны тухай ярилцсан бэ
Хурлын зорилго нь Ази даяарх судлаач, практикт ажилладаг мэргэжилтэн, хяналтын байгууллагын төлөөлөл, багш нарыг нэг дор цуглуулж, бүс нутгийн хэмжээнд хөдөлмөрийн эрүүл ахуйн практикийг хөгжүүлэх явдал байв. Оролцогчид дараах чиглэлээр туршлага, судалгааны үр дүнгээ хуваалцсан байна:
1. Ази тивийн орнуудын хөдөлмөрийн эрүүл ахуйн бодлого, зохицуулалтын хандлага
2. Ажлын байрны эрсдэлийг үнэлэх, хянах техникийн шинэ дэвшил
3. Алслагдсан, хөгжиж буй бүс нутагт зайнаас мэргэжлийн зөвлөгөө (remote IH consultation) үзүүлэх арга зүй
4. Мэргэжлийн сүлжээг бэхжүүлэх, залуу мэргэжилтнүүдийн чадавхыг хөгжүүлэх боломж
Монголын хувьд “хөдөлмөрийн эрүүл ахуй” ямар ач холбогдолтой вэ
ANOH-ийн хурлыг Монголд анх удаа зохион байгуулж байгаа нь манай улсын “хөдөлмөрийн эрүүл ахуй”-н чиглэлийн мэргэжлийн нийгэмлэг олон улсын түвшинд хүлээн зөвшөөрөгдсөний илрэл юм. Хурлын хажуугаар Олон Улсын Хөдөлмөрийн Эрүүл Ахуйн Холбоо (IOHA)-ны удирдах зөвлөл ч мөн Улаанбаатарт хуралдсан нь манай орны энэ салбарын хөгжилд дэмжлэг үзүүлэх олон улсын түншлэлийг улам бэхжүүлэх боломж болсон. Монгол дахь уул уурхай, барилга зэрэг эрсдэл өндөртэй салбаруудын ажилтнуудад шууд холбоотой энэ төрлийн мэдлэг, туршлага солилцоо цаашид дотоодын стандарт, зохицуулалтыг сайжруулахад тустай.
Ази тивийн бусад орны ХАБЭА-н чиг хандлагатай танилцахыг хүсвэл манай Тайландын каучукийн салбарын ажилчдын ХАБЭА-г бэхжүүлж буй тухай нийтлэлийг үзнэ үү.
Эх сурвалж: ANOH 2026 (9th Asian Network of Occupational Hygiene Conference), anoh2026.mn, 2026 оны 9 дүгээр сар.